عبير البياري
ستي يا ستي اشتكتلك يا ستي .. بما أنه "الزعيمة" مسافرة، فإني مشتاق وفي قلبي لوعة. و عسيرة ستي والسفر والطيارات وليالي السمر..إتذكرت غناوية من غناويات ستي الله يذكرها بالخير، من غناوي الزمانات أيام "الدي جي" الأصلي، واللي إيقاعه السحجة والزعكة (اااييييهاااا أو اويييييهااا حسب إذا كانت الحجة مدنية أو فلاحة) وهوي صوت يصدر من قلب و رب، واللي في الجبل الثاني بسمعه و بيجي قبل الزغرودة، و خوف الله يمكن يكون للتحماية!
والزغاريد والطبلة اللي نغمتها موحدة بكل الأغاني، واللي أكيد هلا بتكون تلحنت في بالك (دن دني رح رح دن دن دح) و يا حسرة على غناويات زمان! و الي إتبدلت بالاستيريوهات، هلا صحيح هي أحياناً بتكون مش مفهومة وكلامها مركب، وبذكرنا بالرابط العجيب تبع سبيستون، بس والله كان إلها طعم تاني، وما إلنا بطول السيرة الغناوية بتكول:
"لأطلع عالطيارة فوك واحلحل براغيها، والشباب اشتشال (اشكال) ألوان يا عريس (الاسم و عالأغلب محمد) يا محليها
لأطلع عالطيارة فوك و احلحل مروحتها، والشباب أشكال ألوان والعريس نوارتها
لاطلع عالطيارة فوك واحلحل جنحاتها، والشباب أشكال ألوان و العريس سلطانها"
فكفكن الطيارة و حلحلنها، وما خلن برغي ساغ سليم، له يا حجة تقول مثلث برمودا مش هيك! أنا قلت قبل هيك انه الزعيمة متخيلة حالها عراس الجبهة فوووق، بعدين مرقت طيارة العدو، وطلعت معها الغناوية .. بس ليش الحكي؟ عهاي الأغاني كانت تقوم أعراس و حفلات و تعاليل فلسطين كلها، و برأيي لازم نعمللهم ألبوم و نصير نسمعهم عالراديو.
و بالنهاية و بلا طول خراف، الله يخلي أجدادنا و جداتنا، ويرحم من راح منهم و يتغمد أرواحهم الجنة.
التدوينات المنشورة في قسم "بأقلامكم" لا تعبر بالضرورة عن زيزفون